(କୃଷ୍ଣଚନ୍ଦ୍ର ନୃପ— ରାଗ ରସକାମୋଦୀ, ତାଳ ଆଡ଼ତାଳି)
ଚାହାଁ କି ଶୋଭା ମିତଣୀ ମୁରଲୀପାଣି
ତନୁ ନିନ୍ଦେ ନବଘନ ଇନ୍ଦ୍ରନୀଳମଣି ଗୋ
କେକିପୁଚ୍ଛ ବାଙ୍କଚୂଳ ତ୍ରିଭଙ୍ଗିମା ଠାଣି ଗୋ । ଘୋଷା ।
ଭାଲେ ଗୋରଚନା ଚିତା ବଙ୍କିମା ଚାହାଣୀ
ଭୂରୁ ନୀଳ କାମଚାପ ନାସା ମୋତିମଣି ।
(ପଡ଼ି)
ଗଳେ ବନମାଳା ପୃଷ୍ଠଦେଶେ ଶୋହେ ବେଣୀ
କଟିରେ ହେମକିଙ୍କିଣୀ ବାଜେ କିଣିକିଣି
ଶ୍ରୀକରେ ବଳୟ ପାଦେ ନୂପୁର ବାଜେଣି
ଦେଖି ସେ ମୂରତି ବଶ ନୋହିବ କେ ପୁଣି
ଶ୍ରୀ ଶ୍ରୀ କୃଷ୍ଣଚନ୍ଦ୍ର ନୃପଇନ୍ଦ୍ର ଭଣି ।