(ଅଜ୍ଞାତ କବି— ରାଗ ରସକାମୋଦୀ, ତାଳ ଏକତାଳି)
ଦେଖ ସଜନୀ ବେଣୁପାଣିଙ୍କି ଗୋ
ନବୀନ ନଟବର ଠିଆ ଠାଣିକି ଗୋ
ନୀଳେନ୍ଦ୍ର ମଣି ଆଭା କୋଟି କନ୍ଦର୍ପ ପ୍ରଭା
ସେ ଚାରୁ ବଙ୍କିମା ଚାହାଣୀକି ଗୋ । ଘୋଷା ।
ଶିଖୀ ଚନ୍ଦ୍ରିକା ଚୂଳେ ବେଢ଼ା କେତକୀ ଦଳେ
ଆହା କି ଶୋଭା ଚିନ୍ତାମଣିକି ଗୋ
ତା ଭାଲ ଗୋରଚନା ବୁଡ଼ାଏ ତ ଚେତନା
ରଖାଇ ନ ଦିଏ କା ଆଣିକି ଗୋ । ୧ ।
ନାସା ପୁଟର ମଣି ଦୋହଲିବାର ଠାଣି
ମନ୍ଦ ହାସରେ ନିଏ କିଣିକି ଗୋ
ହେଲେ କୁଳବରତୀ ତା ଫାନ୍ଦରୁ ବରତି
ଯିବ କେ କହ ସଖି କେଣିକି ଗୋ । ୨ ।