(ଗୋପାଳକୃଷ୍ଣ— ରାଗ ମୋହନ କଲ୍ୟାଣ, ତାଳ ଝମ୍ପା)
ଆଜ ବ୍ରଜରାଜ ପୁରେ ଲାଜେ ମୁଁ ବୁଡ଼ିଲି ମା । ଘୋଷା ।
ରୋହିଣୀଙ୍କ ସଙ୍ଗତରେ ଥିଲି ରନ୍ଧନ ମନ୍ଦିରେ
ପଛକୁ ନାଗରବର ଦୃଷ୍ଟିରେ ପଡ଼ିଲି ମା । ୧ ।
ହୃଦ କରେ ଦମଦମ ବୁଦ୍ଧି ମୋ ହୋଇଲା ବାମ
ସୁଧା ସମ ଶିଖରିଣୀ ଜଳେ ନିଉଡ଼ିଲି ମା । ୨ ।
କପଟିନୀ କୁନ୍ଦବଲ୍ଲୀ ଜାଣି ପାଶୁ ଗଲା ଚଳି
ସାରୀ ପଢ଼ିବାରୁ ଆଣି ଓଢ଼ଣୀ ଓଢ଼ିଲି ମା । ୩ ।
ହେଲା କି ପାକ ସମ୍ଭାର ବୋଲି ପଚାରନ୍ତେ ମୋର
ଧୃତି ଖସିଗଲା ପ୍ରତିଉତ୍ତର ହୁଡ଼ିଲି ମା । ୪ ।
ମୋ ଓଷ୍ଠ କମ୍ପିଲା ଚାହିଁ ହସିଲା ସେ ଆଡ଼େ ରହି
ତା ଇଙ୍ଗିତ ହେଜି ଶୀଘ୍ରେ ଅଧର ପୀଡ଼ିଲି ମା । ୫ ।
ଗୋପାଳକୃଷ୍ଣ କହିଲା ରହୁ ଜଟିଳା ଅଇଲା
ଆସନ୍ତୁ ସଜନୀ ତୋତେ କେତେ ମୁଁ ଲୋଡ଼ିଲି ମା । ୬ ।