(କବିସୂର୍ଯ୍ୟ— ରାଗ ସୁରଠ, ତାଳ ରୂପକ)
ଅରଜିବି ପଛେ ଜନ ଅପଖ୍ୟାତିକି ଗୋ
ବରଜିବି କେହି ଘନଶ୍ୟାମ ପ୍ରୀତିକି ଗୋ । ଘୋଷା ।
ତେଜି ଜାଈଦଳ ଶେଯ । ଘନସାର ମଳୟଜ ।
କରିବ କେ ରାଜୀବଦଳକୁ ଗତିକି ଗୋ । ୧ ।
ତା ସୁନ୍ଦର ମନ୍ଦହାସ । ରୁଚିର ଭୂରୁ ବିଳାସ ।
ଛାଡ଼ି ଆଡ଼ିବ କେ ଫୁଲବାଣେ ଛାତିକି ଗୋ । ୨ ।
ପଦକୁ ପୁରନ୍ଦରର । କରିଦେବି କରି ଛାର ।
ନିତି ନିତି ତା ସୁରତେ ସତେ ମାତିକି ଗୋ । ୩ ।
ତେଜିଣ କୋଣ ଚାହାଣୀ । ପୀୟୂଷ ମଧୁର ବାଣୀ ।
ସହିବ କେ କାମରାଜ ଝଳି କାତିକି ଗୋ । ୪ ।
କରି ଗାଢ଼େ ପରିରମ୍ଭ । ତା ଅଧର ପକ୍ୱବିମ୍ବ ।
ପିଉଥିବି ପାହିଯିବା ଯାଏ ରାତିକି ଗୋ । ୫ ।
ବୋଲେ ବସୁଦୁର୍ଗପତି । ଧ୍ୟାନ କରି ତା ମୂରତି ।
ନାମ ଭଜନରେ ବ୍ରତୀ ହେବି ଯତିକି ଗୋ । ୬ ।