(କବିରାଜ ଜୟଦେବ— ରାଗ ବସନ୍ତ, ତାଳ ଯତି)
ବସନ୍ତେ ବାସନ୍ତୀ କୁସୁମ-ସୁକୁମାରୈରବୟବୈ
-ର୍ଭ୍ରମନ୍ତୀଂ କାନ୍ତାରେ ବହୁବିହିତ-କୃଷ୍ଣାନୁସରଣମ୍ ।
ଅମନ୍ଦଂ କନ୍ଦର୍ପ-ଜ୍ୱର-ଜନିତ-ଚିନ୍ତାକୁଳତୟା
ବଳଦ୍ବାଧାଂ ରାଧାଂ ସରସମିଦମୂଚେ ସହଚରୀ ।୭।
। ତୃତୀୟଃ ପ୍ରବନ୍ଧ ।
ବସନ୍ତରାଗଯତିତାଳାଭ୍ୟାଂ ଗୀୟତେ ।
ଅସ୍ୟ ଲକ୍ଷଣମ୍ ।
ଶିଖଣ୍ଡବର୍ହୋଚ୍ଚୟବଦ୍ଧଚୂଡ଼ଃ ପୁଷ୍ଣନ୍ ପିକଂ ଚୂତଲତାଙ୍କୁରେଣ ।
ଭ୍ରମନ୍ମୁଦାରାମମନଙ୍ଗମୂର୍ତ୍ତିର୍ମତୋ ମତଙ୍ଗସ୍ୟ ବସନ୍ତରାଗଃ ।
ଲଳିତ-ଲବଙ୍ଗ-ଲତା-ପରିଶୀଳନ-କୋମଳ-ମଳୟ-ସମୀରେ ।
ମଧୁକର-ନିକର-କରମ୍ବିତ-କୋକିଳ-କୂଜିତ-କୁଞ୍ଜ-କୁଟୀରେ ।
ବିହରତି ହରିରିହ ସରସ-ବସନ୍ତେ
ନୃତ୍ୟତି ଯୁବତି-ଜନେନ ସମଂ ସଖି ବିରହି-ଜନସ୍ୟ ଦୁରନ୍ତେ । ଧ୍ରୁବମ୍ ।୧।
ଉନ୍ମଦ-ମଦନ-ମନୋରଥ-ପଥିକ-ବଧୂଜନ-ଜନିତ-ବିଳାପେ ।
ଅଳିକୁଳ-ସଂକୁଳ-କୁସୁମ-ସମୂହ-ନିରାକୁଳ-ବକୁଳ-କଳାପେ ।୨।
ମୃଗମଦ-ସୌରଭ-ରଭସ-ବଶମ୍ବଦ-ନବ-ଦଳ-ମାଳ-ତମାଳେ ।
ଯୁବଜନ-ହୃଦୟ-ବିଦାରଣ-ମନସିଜ-ନଖରୁଚି-କିଂଶୁକ-ଜାଳେ ।୩।
ମଦନ-ମହୀପତି-କନକ-ଦଣ୍ଡ-ରୁଚି-କେଶର-କୁସୁମ-ବିକାଶେ ।
ମିଳିତ-ଶିଳୀମୁଖ-ପାଟଳି-ପଟଳ-କୃତ-ସ୍ମର-ତୂଣ-ବିଳାସେ ।୪।
ବିଗଳିତ-ଲଜ୍ଜିତ-ଜଗଦବଲୋକନ-ତରୁଣ-କରୁଣ-କୃତହାସେ ।
ବିରହି-ନିକୃନ୍ତନ-କୁନ୍ତ-ମୁଖାକୃତି-କେତକି-ଦନ୍ତୁରିତାଶେ ।୫।
ମାଧବିକା-ପରିମଳ-ଲଳିତେ ନବ-ମାଳିକ-ଜାତି-ସୁଗନ୍ଧୌ ।
ମୁନି-ମାନସମପି ମୋହନ-କାରିଣି ତରୁଣାକାରଣ-ବନ୍ଧୌ ।୬।
ସ୍ଫୁରଦତିମୁକ୍ତ-ଲତା-ପରିରମ୍ଭଣ-ମୁକୁଳିତ-ପୁଲକିତ-ଚୂତେ ।
ବୃନ୍ଦାବନ-ବିପିନେ ପରିସର-ପରିଗତ-ଯମୁନା-ଜଳ-ପୂତେ ।୭।
ଶ୍ରୀଜୟଦେବ-ଭଣିତମିଦମୁଦୟତି ହରି-ଚରଣ-ସ୍ମୃତି-ସାରମ୍ ।
ସରସ-ବସନ୍ତ-ସମୟ-ବନ-ବର୍ଣ୍ଣନମନୁଗତ-ମଦନ-ବିକାରମ୍ ।୮।
(Lalitalavangalata / Lalita Labanga Lata / Viharati Haririha Sarasavasante / Biharati Haririha Sarasabasante / Gita Govinda / Geeta Govinda / Gita Gobinda / Jayadeva / Jayadeba )